প্রিন্ট এর তারিখঃ জুন ৬, ২০২৫, ১২:৫০ এ.এম || প্রকাশের তারিখঃ নভেম্বর ১২, ২০২৪, ৮:৩৯ অপরাহ্ণ
Sylheti Poem: থাকমু স্বর্গর মাঝে
(সিলেটের আঞ্চলিক ভাষায় কবিতা)
রেবা গোস্বামী (মৌলভীবাজার):
ধুৎতরি ছাঁই ভাল্লাগে না,
শান্তি পাইনা মনো।
শৈল্য খালি অবায় বিষ হবায় বিষ,
বিষোর বাড়ি যেনো।
দিন তো যার গি দিনোর বায়দি,
হিসাব করি না তো।
দেখতে দেখতে বয়স অইলো,
তিন কুড়ি অউ মতো।
আর কতদিন থাকমু ভালা,
দিন তো গইয়া যায়।
চুল, দাঁত, চৌখ কিচ্ছুই আর,
আগোর লাখান নায়।
ভালা খাওয়া অজম অয় না,
পেটে ঘুর ঘুর করে।
জোড়ে শব্দ সহ্য অয় না,
কানো আইয়া ধরে।
কানে অতো হুনিও না,
আগোর লাখান অতো।
একতা কইলে আরতা হুনি,
বেবুতার অউ মতো।
হাটতে গেলে পাও দুখানে,
বাড়াবাড়ি করে।
আতোর কথা কইতাম কিতা?
বেদনায় খালি চিনচিনাইয়া ধরে।
টেপির মায়ে জোয়ান থাকতে,
করছি কতো কাম।
অখন একটুক কুন্তা করতে চাইলেউ,
শৈল্যে ঝরে ঘাম।
চাটিত পড়লে চলমু কেমনে,
ধরবো কে বা আইয়া।
ব্যস্ত জীবন হক্কলর অউত্ত,
চায় চাকরী লইয়া।
এর থাকিয়া চলো থাকতে যাইগি যুদি,
উপরআলার কাছে।
ওটাউ অইবো স্বর্গ পাওয়া,
থাকমু স্বর্গর মাঝে।
প্রেরক: সত্যজিৎ দাস (মৌলভীবাজার প্রতিনিধি)
সিলেট ২৪ বাংলা/এসডি.
© সর্বস্বত্ব স্বত্বাধিকার সংরক্ষিত
